Nin – si uu isku dareensiiyo inuu caruus yahay – u xada dharka caruusadaha.

Beijing (Himilonetwork) – 50-jir u dhashay dalka Shiinaha waxaa dhawaan xiray booliska Shanghai kaddib markii uu ka xaday 70 darees oo kuwa loo xiro aroosadaha ah habeenka aqal-galkooda dhowr dukaan oo iibiya dharka aroosyada.

Markii la weydiiyay sababta uu sidaan u sameynayay, ninkan oo xaas hore soo furay wuxuu ku jawaabay ‘waxaan doonayay inaan is dareensiiyo inaan guursanayo mar labaad.’

Booliska Shanghai ayaa warqad cabasho waxay kasoo gaartay mid kamid ah dukaamada oo la yiraahdo Pudong New Area oo milkiliihiisa Wang ay sheegtay in dhowr nuuc oo dharka aroosyada ah lagala baxay rugteeda taniyo bilowgii sannadkan.

Waxay sheegtay in bil walba ay lumin jirtay mid iyo laba xabo oo dharka aroosyada iyada oo aan ogeyn halka looga soo dhaco. Waana markaas kolkii ay go’aansatay inay booliska la wadaagto xatooyada lagu hayo.

Wang waxay sheegtay in dharka oo inta badan ku waran xargaha gurigeeda lala dagi jiray xilliga habeenkii. Markii la hubiyay socodka kaamirada guriga, waxaa la arkay nin kasoo dhacaya gidaarka guriga si uu ula dego dharka suran xargaha.

Markii la ogaaday ninka heybtiisa, waxaa laga soo qabtay xaafadda  Tangzhen, – halkaas oo ay sidoo kale ka dhex heleen 73 kale oo dharka aroosyada ah kuwaas oo ku kacaya adduun lacageed dhan 60,000 yuan ($8,740).

Mar la weydiiyay sababta ku qaaday inuu sidaan sameeyo, wuxuu si fudud ku yiri; ‘waxaan jeclaa inaan dareemo anigoo mar labaad guursanaya.’

Wuxuu si adag u yiri; “Ku tala-galkaygu ma aheyn inaan xatooyo sameeyo.”

Baaritaan lagu sameeyey caafimaadkiisa ayaa lagu ogaaday inuusan qabin wax xanuun dhinaca maskaxda ah.