Q9aad: Ereyo iyo Oraahyo Jaceyl xanbaarsan!

Posted by: Himilo in Dhanbaallada May 18, 2020 0 2,869 Views

Waro ila biyood lahoo, geeduhu anwaaciyo miro aada bixiyeen aragoodii lihidaa.
Deymada xishoodkaa markaad luqunta dadabtaa kolba laygu didayaa oo layga darayaa.
Amal barashadaadii jaceyl bay abaaray. Adna kugu ekaayoo eebadu ku gaartaye, ababsiinta caashaqa awoodeeda lihinaa.
Daruuraha aslaayee, ashkir dahab la moodiyo, sagalladaa abuurmaya aragoodii lihidaa.
Dumar ugu fil rooneey, dayax shan iyo tobnaad, dahab lagu mitaalaay. Da’deeda 17 jir guga loogu daraayee, indha-deeraaleey.
Kuwo loogu dow galay labada is-doortee, kala dila dadka is jecel, yaanay isku kaaya dirin, dunida nabad ku noolow.
Haku daalin jeedaal. Indha sooma jeedsaan, qalbi kaa janjeera.
Dhinacyada wadnaha iyo dhabtuu kalgacalkuna meel dheer buu iiga yaal.
Dhudi dhex yar dhabanno hoobaan, adigaa dheg iyo qurux Rabbi kuu dhameeyo, inta aad dumarka dheer tahay dhulka aad ku dhalatiyo dhaqan hooyo weeyaan.
Cimrigay intaan jiray carro edeg intaan maray caashaqaadu ima deyn oo kama calool go’in.
Haddii aad jamato cadawgaa iyo ruux ku jiir neceb, harka kuuma jiidaan.
Sida aad dhallaan tahay oo aan ku dhalay dadka kaa dhaweystay.
Sidii baan dhexdiyo dhabta ugu sidaa jaceylku ii dhibaa. Inuu dheeliyoo dhulka uu ku dhaco uga dhowrayaa.
Dantu wadajir iyo dhan haddii aan ka nahay, ha iga dhiman innaga oon isku soo dhawaan.

HimiloNetwork Han & Horseed