Nin deriskiisa ku dhibi jiray dhawaq jugta culus ee muusiga oo xabsiga la dhigay!

MUQDISHO (HN) — Nin u dhashay dalka Spain oo ku nool magaalada Barcelona ayaa lagu riday xukun hal sano oo xabsi ah kaddib markii la sheegay inuu muddo shan sannadood ah jaarkiisa ku dhibayay dhawaqa muusig aad u dheer oo uu shidan jiray marwalba – habeen iyo dharaar.

Dhib iyo dheeraad ayay ku qabeen dhaqankiisa waalidda ah maadaama uu dheerayn jiray muusigga mar kasta oo uu dhageysanayo. Sannadkii 2012 ayuu soo bilaabay dhageysiga heesaha jugta culus oo habeen iyo dharaar ka daaran gurigiisa.

Codsiyo badan oo deriskiisu u direen bal inuu ka gaabiyo ayaa kusoo dhammaaday dhicis kuna dhacay dhego leyr u duleela. Xattaa waxaa garta si xaal mastuuro ah usoo fara-geliyay booliska balse waa ku gacanseyray.

Si kastaba, saddex kamid ah jaarkiisa ayaa maxkamadda u diray dacwad ka dhan ah ninkan iyaga oo sheegay inay dhib aan yareyn ku qabaan muusigiisa dheer. Waxaana ugu dambeyntii gartu kusoo dhamaatay in ninkan xabsiga la dhigo si looga nasto. Hadda wuxuu sannad ku jiri doonaa xabsiga, waxaana usii dheer inuu mar kale ku noqon doono haddii dacwad kale lagu soo oogo.