MUQDISHO (HN) – Muranno xooggan ayaa ka dhashay magaalada Modasa ee gobolka Gujarat kadib markii nin dhalinyaro Muslim ah uu ku andacooday in si cad loo bahdilay isla markaana loogu yeeray “argagixiso” gudaha xarun caafimaad oo gaar loo leeyahay.
Falkan ayaa ka dhacday isbitaalka Dr Vinay Gandhi Hospital xilli la buuxinayay waraaqaha caadiga ah ee bukaanka.
Ninka oo lagu magacaabo Suthar Moin ayaa sheegay in shaqaale katirsan farmashiyaha isbitaalka uu eegay magaciisa dabadeed si cod dheer u yiri: ‘Argagaxisadii ayaa timid.’
Hadalkaas ayaa, sida uu sheegay, ku noqday isaga iyo qoyskiisa naxdin iyo bahdil weyn.
Wax ku bilowday booqasho caafimaad oo caadi ah ayaa isu beddeshay xaalad ceeb iyo eedeyn la xiriirta takoor diimeed. Moin oo aad uga xumaaday dhacdada ayaa u tagay madaxa isbitaalka, Dr. Vinay Gandhi isaga oo ka dalbaday in tallaabo laga qaado shaqaalihii hadalkaas yiri.
Hayeeshee, sida uu Moin sheegay, dhakhtarku si aan dan ka lahayn ayuu uga jawaabay cabashadiisa. Wuxuuna ku yiri: ‘Cidda aad doonto u wac – xattaa warbaahinta. Wax dhib ah iguma heyso.’
Jawaabta dhakhtarka ayaa dhalisay cambaareyn xooggan oo uga timid shacabka deegaanka, u-doodayaasha xuquuqda bulshada iyo dadka isticmaala baraha bulshada. Dad badan ayaa sheegay in xarumaha caafimaadku ay tahay meel ka madax bannaan nacayb iyo eex, isla markaana aysan habboonayn in qof lagu xukumo magaciisa ama diintiisa.
Dhacdadan ayaa si weyn ugu faaftay baraha bulshada iyada oo dad badan ay ku tilmaameen inay tahay xadgudub ka dhan ah qiyamka dastuuriga ah iyo karaamada bani’aadamka. Mid kamid ah qoraalladii sida weyn loo wadaagay ayaa yiri: ‘Yaa siiyay geesinimada ay qof ugu tilmaamayaan argagaxiso iyaga oo magac kaliya eegaya?’
Qoraalkaas ayaa sidoo kale muujiyay walaaca laga qabo kororka nacaybka iyo takoorka xitaa meelaha muhiimka ah sida adeegyada caafimaadka.
Hadda waxaa maamulka looga baaqayaa inay sameeyaan baaritaan dhammaystiran oo caddaalad ah. Dad badan oo baraha bulshada jooga ayaa dalbanaya in tallaabo adag laga qaado cid kasta oo mas’uul ka ahayd dhacdadan, si loo hubiyo in bukaan kasta, iyadoon loo eegayn diintiisa ama aqoonsigiisa loo muujiyo ixtiraam iyo loola dhaqmo si siman.
Kiiskani wuxuu sidoo kale dib u huriyay dood ku saabsan muhiimadda wada noolaanshaha bulshada iyo baahida loo qabo in la ciribtiro dhaqamada takoorka ah ee ka dhaca goobaha dadweynaha.
