MUQDISHO (HN) – Sannadkii 1997, waxaa la dhammaystiray Buundada Shuikousi oo sidoo kale loo yaqaan Shuikousi Overpass. Muddo yar kaddib, buundadan ayaa noqotay goob laga hirgeliyo mashruuc deegaan oo aan caadi ahayn.
Maadaama magaalada Guiyang ay ka jirtay yaraanta dhul laga dhiso guryo jaban, mas’uuliyiinta ayaa go’aansaday inay ka faa’iidaystaan bannaanka ku yaalla buundada hoosteeda oo laga dhiso dhowr dhismayaal dabaqyo ah.
Ujeeddadu waxay ahayd in la isticmaalo dhulkii bannaanaa oo ku dhowaa bartamaha magaalada, halkii magaalada loo sii ballaarin lahaa dhinacyada fog. Sidaas darteed, dadka deggan guryahaas waxay heleen fursad ay si sahlan ugu gaari karaan bartamaha magaalada.
Si kastaba ha ahaatee, arrintaasi waxay lahayd cillado. Dhismayaasha oo si dhow ugu yiillay buundada waxay si joogto ah ula kulmi jireen buuqa gaadiidka iyo gariirka ka dhasha baabuurta maraysa dusha sare ee buundada.
Laba sannadood kaddib markii buundada la dhammeeyay, waxaa hoosteeda laga dhisay ku dhowaad 10 dhismayaal deegaan ah oo loo qorsheeyay hannaan guryo kiro jaban ah iyo guryo dib-u-dejin loogu sameynayo dadkii la raray. Intii waqtigu socdayna, waxaa lagu sii daray dhismayaal kale oo laga dhisay dhulkii bannaannaa ee soo haray.
Sida la filayay, buuqa joogtada ah iyo gariirka gaadiidka ayaa qayb ka noqday nolol maalmeedka kumannaan qof oo halkaas ku nool. Balse, dadka deggan intooda badan kama caban jirin xaaladdaas. Waxay aaminsanaayeen in faa’iidooyinka ay ka helayaan guriyahaas — sida qiimaha jaban iyo u dhowaanshaha bartamaha magaalada — ay ka badan yihiin dhibaatooyinka la socda.
Si loo hagaajiyo xaaladda, maamulka magaalada ayaa markii dambe mamnuucay in gawaarida waaweyn ee xamuulka qaada ay maraan buundada, taas oo wax yar yareysay buuqa iyo gariirka. In kasta oo goobtu aysan weli ahayn meel deggan ama raaxo badan, isla markaana boorka waddadu uu weli galo guryaha, haddana kirada jaban iyo goobta ay ku taallo ayaa dadka soo jiidata.
Maanta, bulshada ku nool Buundada Shuikousi hoosteeda waxaa loo arkaa tusaale hal-abuur leh oo lagu maareeyay ciriiriga magaalo ay ku nool yihiin in ka badan afar milyan oo qof oo hadda hoy ka helay dhul cabbirkiisu aad u kooban yahay.
