Sabab yaab leh ayuu geeridiisa uga beensheegay!

MUQDISHO (HN) — Nin u dhashay dalka Brazil ayaa sameeyey fal lala yaabay kaddib markii uu ka beensheegay dhimashadiisa si uu u ogaado cidda kasoo qeybgasha tacsidiisa iyo cidda aan kasoo qeybgalin ee saaxiibada kamid ah.

Muddo badan ayuu 60 jirkan u kuurgashay tacsida dadka uu yiqiin oo ay kasoo qeybgaleen saaxiibo hal iyo labo ah oo ay ifka isaga dhawaayeen dadka kale. Markii ugu dambeeyey wuxuu goobjoog ka noqday tacsi ay kaliya labo qof oo saaxiibo ah kasoo qeybgaleen kadib kolkii saaxiibkood geeriyooday.

Walaac ayay runtii ninkani ku beertay xaaladdan. Wuxuuna iskiis u go’aansaday inuu bal nolosha ku ogaado cidda kasoo qeybgasha tacsidiisa. Waana marka uu ka beensheegay dhimashadiisa isaga oo wax dhintay iskaga dhigaya.

Markii warka geeridiisa uu baahay dad badan oo saaxiibadiisa ayaa ka naxay iyaga oo lama filaanka dhimashadiisa isaga tacsiyeeyey. La-yaabse waxaa ku noqday markii kasoo qeybgalayaasha tacsida ay arkeen ninkan oo kasoo baxaya naxashka.

Qaar badan naxdin awgeed ayaa afku iskugu qabsami waayay – halka in kale ay ilmeeyeen. Dad badan ayaase ku canbaareeyey doqonimo. Waxay ku tilmaameen inuu ku dhiirraday wax aan lagu kaftami karin.

Balse ugu yaraan ninkan ayaa hadda kala yaqaan cidda berri marka uu si dhab ah u geeriyoodo tacsidiisa imaan doonta iyo cidda aanay daniba ka geli doonin.