MUQDISHO (HN) – Kadib markii ay ka daaleen sugitaanka in booliiska deegaanka ay qabtaan shaqadooda oo ay dambiilayaasha sharciga horgeeyaan, qof aan la aqoonsan oo sharciga gacantiisa ku qaatay (vigilante) ayaa kasoo baxay magaalada Lagos de Moreno ee gobolka Jalisco. Qofkan ayaa lagu eedeeyay inuu tuugada mootooyinka ku xiro tiirarka nalalka waddooyinka isaga oo adeegsanaya cajalad adag kadibna halkaas uga taga si ay booliisku u helaan. Ilaa hadda ugu yaraan shan qof ayaa sidan gacanta loogu dhigay.
Qofkan qarsoodiga ah oo dadka qaar ugu yeereen “Batman-ka Lagos de Moreno” waxaa la sheegay inuu hawlgalladiisa bilaabay bartamihii bishii Juun. Qofkii ugu horreeyay ayaa la helay 13-kii Juun isaga oo ku xiran tiir nal, waxaana fooddiisa lagu qoray erayga “Tuug”. Meel u dhow waxaa sidoo kale laga helay mooto la tuhunsanaa in la xaday, taas oo dhalisay tuhunka ah in ninka la xiray lagu eedeeyay xatooyo.
Tan iyo markaas, booliisku waxay heleen ugu yaraan afar qof oo kale oo si la mid ah loogu xiray tiirarka nalalka.
In kasta oo dad badan ay rumeysan yihiin in falalkan uu fulinayo hal qof oo keliya, mas’uuliyiinta deegaanka ayaa warbaahinta u sheegay inay suurta-gal tahay in arrintan ay ka dambeyso koox dad ah oo sharciga gacantooda ku qaata.
Xoghayaha Amniga Dadweynaha ee gobolka Jalisco, Juan Pablo Hernández, ayaa sheegay inay baaritaanno socdaan si loo ogaado cidda ka dambeysa weerarradan. Wuxuu sidoo kale carrabka ku adkeeyay in shanta nin ee la helay ilaa hadda loo tix-gelinayo dhibbaneyaal, isaga oo xusay inaan qofna loo oggolayn inuu sharciga gacantiisa ku qaato, sabab kasta ha lahaatee.
Dhacdadan ayaa dood weyn ka dhalisay baraha bulshada ee Mexico. Qaar badan ayaa cambaareeyay waxa ay ugu yeereen cadaalad uu qof iskiis u fulinayo, halka kuwo kalena ay muujiyeen taageero ay u hayaan qofka falalkan lagu tuhunsan yahay.
Arrintan waxay na xusuusinaysaa dhacdo lamid ah oo ka dhacday magaalada Puerto Vallarta sannadkii 2018, markaas oo ugu yaraan 11 qof la helay iyaga oo gebi ahaanba qaawan, laguna xiray tiirarka nalalka, isla markaana xarafka “R” looga qoray dhabarka madaxa. Kiiskaas ilaa maanta lama oga cidda ka dambeysay.
