Da’yar waayay gabar uu shukaansado oo isku xayaysiinaya boor

MUQDISHO (HN) — 23 jir u dhashay dalka England – kaas oo aan weligiis naag shukaansan – ayaa doonaya hadda inuu helo gabar haasaawe la yeelata. Wuxuuna taas u marayaa boorarka lagu dhejiyay waddooyinka oo sawirkiisa iyo qoraal u dhigan – yaa ila haasaawaya lagu dhigay.

Ed Chapman wuxuu sheegay inuu isku dayo badan oo uu kula haasaawi kari lahaa geyaankiisa ay kusoo idlaadeen fashil. Laakiin markii uu ka daalay inuu iskiis wax u raadsado uu go’aansaday inuu rabitaankiisa usoo bandhigo dadweynaha. Wuxuuna magaalada Leeds waddooyinka dhinac surtay boorar lagu xardhay sawirkiisa. Lacag adag oo badan ayuu runtii ku bixiyay inuu farriintiisa ku baahiyo.

Laakiin durba wuxuu tilmaamay inuu horumar fiican ka helay tallaabtiisan taas oo uu sannado badan ku heli waayay. Wuxuu hoosta ka xariiqay in gabdho badan oo geyaankiisa ah ay hadda usoo dirayaan farriimo bogaadin, rabitaan iyo barasho iskugu jira.