MUQDISHO (HN) – Arday Muslim ah oo madrasa dhigta ayaa la sheegay in koox rag ah oo sakhraansan ay ku weerareen tareen ku safrayay magaalada Meerut ilaa Deoband ee gobolka Uttar Pradesh, dalka Hindiya.
Muntazir, oo ahaa arday u socday xarunta caanka ah ee Darul Uloom Deoband, wuxuu tareenka ka raacay Meerut, isaga oo si deggan u fadhiyay kahor inta qaar kamid ah ragga tareenka saarnaa oo khamri cabsanaa ay dhowr jeer usoo bandhigeen inuu khamri cabo.
Muntazir wuu ku gacan-seyray doonistooda. Wuuna diiday isaga oo beddelanaya kursigii uu fadhiyay.
Markii ay raggu sii wadeen inay ku cadaadiyaan, wuxuu u wareegay qeyb kale oo tareenka ah. Laakiin dhowr goob-fadhi kaddib, raggan ayaa ugu daba-tagay meeshii uu u wareegay. Waxaana la sheegay inay aflagaaddeeyeen, kadibna ay garaaceen kolkii uu isku dayay inuu mar kale ka fogaado.
Ugu dambayn, Muntazir ayaa lagu qasbay inuu ka dego tareenka saldhigga Khatauli. Waxaa sidoo kale la sheegay in laga qaatay telefoonkiisa iyo lacag caddaan ah oo uu sitay.
Mana ahan dhacdadan mid agoon ah. Bishii Abril ee sannadkan, Maulana Tousif Raza Mazhari, oo 30 jir imaam iyo macallin madrasa ah kana soo jeeda Siwan, Bihar, ayaa la garaacay kadibna laga tuuray tareen socda meel u dhow saldhigga tareenka ee Bareilly.
Waxa uu Bareilly u safray si uu uga qayb-galo Urs-ka Tajusharia.
Xaaskiisa, Tabassum Khatoon, ayaa sheegtay in ninkeeda uu muuqaal-wicitaan kusoo garaacay isaga oo cabsi qaba. Sida ay sheegtay, kooxdii weerartay waxay ku eedeeyeen inuu wax xaday.
Waxay xustay inuu tusay buugaagtiisa iyo boorsadiisa, isaga oo ku adkaysanayay inuu yahay macallin, halka iyaduna ay telefoonka ka qaylinaysay oo gargaar dalbanaysay. Hase yeeshee, sida ay sheegtay, cidina uma soo gurman.
Dhaawacyadii ka dhashay weerarka ayaa markii dambe sababay dhimashadiisa.
