Tartanka Mootooyinka ee Buurta aan la rumaysan karin in la fuulo!

MUQDISHO (HN) – Subida Impossível, oo micnaheedu yahay “Fuulitaanka aan suurta-galka ahayn”, waa tartan aad u adag oo mootada nooca motocross-ka lagu fuulo buur dhagax leh. Waa dhacdo sannad kasta lagu qabto dalka Boortaqiiska.

Sannad kasta, tobaneeyo kamid ah wadayaasha ugu khibradda badan motocross-ka ayaa isugu yimaada magaalada Silves si ay ugu tartamaan caqabaddan adag ugana kasbadaan sumcad iyo sharaf ay ku dhex yeeshaan ciyaartoyda kale.

Tartankan waxaa loo tix-geliyaa mid kamid ah kuwa ugu adag dunida, maadaama wadayaasha looga baahan yahay inay si buuxda u xakameeyaan mootadooda si ay uga gudbaan buur dhagax ah oo dhererkeedu yahay 110 mitir.

In kasta oo 110 mitir uusan u muuqan masaafo dheer, haddana dhibaatada dhabta ahi waxay tahay in meelo badan oo buurta kamid ahi ay leedahay jajab iyo jiirooyin badan. Waana mid aad u ciriiri ah oo dhagaxyo badan leh kana dhigaysa safarka mid aan la saadaalin karin.

Magaca Fuulitaanka aan suurta-galka ahayn ma ahan mid iska yimid. In ka badan labaatan sannadood oo tartankan la qabanayay, tiro aad u yar oo kamid ah tartamayaasha ayaa ku guuleystay inay gaaraan dhammaadka buurta.

Sababta oo ah tartanku aad buu u adag yahay, mararka qaarkood qofka guuleysta ma ahan kan gaaray buurta dusheeda, balse waa kan ugu fog ee buurta kor uga fuula kahor inta uusan dib usoo simbiriirixan ama ka bixin xadka waddada loo asteeyay.

Tusaale ahaan, sannadkii hore, João Lourenço wuxuu gaaray dhammaadka tartanka, balse waxaa laga reebay natiijada maadaama uu ka baxay xariiqii loo asteeyay waddada. Sidaas darteed, kaalinta koowaad waxaa loo aqoonsaday Luís Romão, kaas oo buurta ka fuulay 72 mitir iyo 50 sentimitir kahor inta uusan mootadiisa ka dhicin.

Si tartamuhu ugu guuleysto si rasmi ah, waa inuu gaaro buurta dusheeda isaga oo aan marna cagihiisa dhulka dhigin.

Sida uu sheegay Naadiga Mootooyinka ee Albufeira, oo ah qabanqaabiyaha tartanka: “Kartida uu waduhu u leeyahay inuu si buuxda u xakameeyo mootadiisa oo ay weheliso go’aan adag iyo adkaysi, waa furaha guusha. Dhulka adag ayaa tijaabiya awoodda wadaha iyo tayada mootada ilaa heerkeeda ugu sarreeya.”

Dhulka dhagaxa leh ayaa ah caqabadda ugu weyn, sababta oo ah wuxuu si weyn u saameeyaa isku dheelli-tirka iyo qabsashada taayirrada. Haddii waduhu si xad-dhaaf ah u dedejiyo mootada, wuxuu halis ugu jiraa inuu lumiyo xakamaynta. Haddii uu si gaabis ah u socdana, ma awoodi karo inuu ka adkaado culeyska jiirada ama koritaanka buurta.

In kasta oo dhaawacyadu aysan badnayn, qaar kamid ah tartamayaasha ayaa sheegay in mootadoodii ay si weyn ugu burbureen tartankan. Si kastaba, dadka ka qayb-gala waxay u arkaan khatarta iyo adkaantu inay qayb ka yihiin waayo-aragnimada gaarka ah ee Subida Impossível.