MUQDISHO (HN) – Ugu yaraan 3,255 haween ah iyo 1,016 gabdhood oo aan qaan-gaarin ayaa weli lagu la’yahay gobolka Jammu iyo Kashmir ee dalka Hindiya, kaddib markii lasoo weriyay in la waayey intii u dhexeysay sannadihii 2019 iyo 2026. Xogtan waxaa laga helay Waaxda Arrimaha Gudaha ee maamulka Jammu iyo Kashmir, iyada oo la adeegsanayo Sharciga Xaqa Helitaanka Macluumaadka.
Tirooyinkan oo uu baahiyey wargeyska afka Ingiriisiga kusoo baxa ee The Tribune ayaa muujinaya in guud ahaan 4,271 haween iyo gabdho ah ay weli maqan yihiin. Waxaa la xusay in 16,397 haween iyo gabdho ah lasoo sheegay in la waayey – kuwaas oo 12,126 kamid ah markii dambe la helay. Tani waxay ka dhigan tahay in in ka badan 26 boqolkiiba kiisaska lasoo tebiyay aan weli xal laga gaarin.
Xogtan ayaa muujinaysa walaaca sii kordhaya oo laga qabo haweenka iyo carruurta la la’yahay ee ku nool Jammu iyo Kashmir, iyada oo qoysas badan ay weli sugayaan war ku saabsan halka ay ku sugan yihiin ehelkooda maqan.
Tirada 1,016 gabdhood oo aan qaan-gaarin oo weli la la’yahay ayaa si gaar ah walaac u dhalinaysa, maadaama carruurtu yihiin dad nugul oo u baahan ilaalin dheeraad ah. Arrintan ayaa sidoo kale muujinaysa muhiimadda ay leedahay in baaritaannada la dedejiyo lana xoojiyo hababka lagu raadinayo dadka maqan si loo ogaado halka ay ku sugan yihiin.
