MUQDISHO (HN) – Malaayiin qof ayaa sannad kasta booqda buuraha barakaysan ee Shiinaha. Tani waxay la micno tahay in ilaalinta nadaafadda buuraha ay tahay howl aad u adag. Si kastaba, waxaa jira shaqaale geesiyaal ah oo shaqadan qabta loona yaqaan Nadiifiyeyaasha duula.
Halyeeyadan – ragga iyo dumarka isugu jira – waxay maalin kasta naftooda halis-u-geliyaan sidii ay u ururin lahaayeen qashinka ay dalxiisayaashu ku tuuraan buuraha dhaadheer iyo meelaha halista ah. Iyaga oo adeegsanaya xargo iyo qalab fuulitaan, waxay kasoo laalaadsadaan dusha sare si ay u gaaraan caagadaha, bacaha iyo qashinka kale oo lagu tuuro meelaha ay adag tahay in si fudud lagu gaaro.
Magaca Spider-Man cleaners waxay ka heleen shaqada halista ah oo ay qabtaan oo u baahan inay buuraha dhaadheer kasoo laalaadsadaan iyaga oo ku tiirsan xargo ama fiilooyin.
Sawirro ay warbaahintu baahisay ayaa muujinaya shaqaalahan oo kumannaan fiit ka sarreeya dhulka kuna dheggan dhinacyada buuraha, iyaga oo isku dayaya inay ururiyaan qashinka ku jira meelaha ugu adag ee la gaari karo.
Si ay dadka ugu baraarujiyaan halista shaqadooda, ugana dhaadhiciyaan dalxiisayaasha inaysan qashinka ku tuurin buuraha, qaar kamid ah shaqaalahan ayaa dharkoodii caadiga ahaa ku beddelay dharka halyeyga filimada ee Spider-Man.
Tallaabadan ayaa ka dhigtay kuwo ay booqdayaashu aad u xiiseeyaan. Dadka dalxiiska u taga ayaa mararka qaarkood istaaga si ay u daawadaan shaqaalahan oo buuraha kasoo laalaada.
Marka ay shaqadooda dhammeeyaan, dalxiisayaashu waxay ku abaalmariyaan sacab iyo dhiirri-gelin.
Warbaahinta Shiinaha ayaa inta badan shaqaalahan ku tilmaanta geesiyaal, waana arrin la fahmi karo marka la eego halista ay maalin kasta la kulmaan.
Waxay naftooda khatar-u-geliyaan si ay u ururiyaan qashinka ay dalxiisayaashu kaga tagaan goobaha caanka ah ee loo dalxiis tago iyaga oo aan ka fikirin saameynta qashinkoodu ku yeelan karo deegaanka ama dadka loo xilsaaray nadaafaddiisa.
Dhaawacyadu waa wax soo noqnoqda, halka culayska shaqaduna uu mararka qaarkood aad u bato ilaa heer ay shaqaaluhu suuxaan!
Sannadkii 2014-kii, wargeysyada Shiinaha ayaa qoray dhacdo ku saabsan haweeney kamid ahayd nadiifiyeyaashan oo suuxday xilli ay qashin ka ururinaysay taallo weyn oo dhagax ah oo ku taalla goobta dalxiiska ee Meng Guimeng, magaalada Linyi ee gobolka Shandong.
Maadaama shaqadani ay tahay mid halis badan, dad yar ayaa ku dhiirrada inay qabtaan. Kuwa aqbala shaqadan waxaa la siiyaa mushahar aad u sarreeya.
Tusaale ahaan, laba sano kahor xilliga ay warbixintani ka hadlaysay, maamulka goobta dalxiiska ee Guimeng ayaa baahiyay xayeysiis shaqo oo lagu raadinayay qof qaban kara hawshan.
Waxay soo bandhigeen mushahar dhan 10,000 yuan oo Shiinaha ah maalintii oo xilligaa lagu qiyaasay $1,600.
Si kastaba, xayeysiiska waxaa ku jiray digniin cad oo ahayd in shaqada lagu qabanayo mas’uuliyadda qofka shaqada qabanaya oo muujinaysay heerka halista ku jirta.
Nadiifiyeyaasha Spider-Man-ka ee ku kala sugan buuraha iyo goobaha dalxiiska Shiinaha ayaa sannad kasta ururiya xaddi badan oo qashin ah.
Qaar kamid ah shaqaalahan ayaa hawshan ku jiray in ka badan toban sano, in kasta oo ay jiraan khataro badan oo la xiriira shaqadooda.
Mid kamid ah shaqaalahaas waa Peng Wen, oo muddo 17 sano ah nadaafadda ku ilaalinayay Buurta Emei ee Shiinaha.
Peng Wen ayaa sheegay inuu sannadihii u dambeeyay arkay hoos-u-dhac muuqda oo ku yimid qashinka ay dalxiisayaashu kaga tagaan buurta. Taas macnaheedu waa inuusan hadda sidii hore mar kasta naftiisa khatar ugu gelinin ururinta qashinka.
Hoos-u-dhaca qashinka ayaa loo arki karaa calaamad muujinaysa in wacyi-gelinta bulshada iyo soo bandhigidda shaqada nadiifiyeyaasha ay dadka qaarkood ku dhiirri-gelisay inay ka fiirsadaan falalkooda.
Sheekada nadiifiyeyaasha Spider-Man-ka waxay ina xusuusinaysaa in fal yar oo uu qof sameeyo sida; inuu caag ama bac ku tuuro buur uu qof kale ku qasbi karo inuu naftiisa halis geliyo si uu u nadiifiyo.
Ilaalinta deegaanku ma ahan oo keliya mas’uuliyadda shaqaalaha nadaafadda, balse waa waajib saaran qof kasta oo booqda goobaha dabiiciga ah.
Marka xigta oo aad damacdo inaad qashin ku tuurto goob dalxiis, buur ama waddo, xusuusnow dadka naftooda halis u geliya sidii ay deegaanka nadiif ugu ilaalin lahaayeen bulshada oo dhan.
Qashinkaaga meel ku habboon ku rid. Ha ka dhigin qof kale inuu naftiisa halis u geliyo si uu u ururiyo.
